Mlinzi na nahodha msaidizi wa Simba SC, Rushine De Reuck, amefunguka kuhusu mazingira magumu aliyokulia katika eneo la Cape Flats, Cape Town nchini Afrika Kusini, akieleza kuwa uhalifu, dawa za kulevya na magenge yalikuwa sehemu ya changamoto za maisha ya eneo hilo.
De Reuck, ambaye alizaliwa na kukulia Kalksteenfontein, amesema baadhi ya watu aliokua nao tangu utotoni walijikuta wakiingia katika maisha ya uhalifu, huku wengine wakifungwa na wengine kupoteza maisha kutokana na matukio yanayohusishwa na uhalifu.
“Wenzangu ambao tulikuwa pamoja tangu tukiwa wadogo, leo hii wapo jela na wengine wameshakufa kwa matukio ya kihalifu,” alisema De Reuck.
Akizungumza kuhusu namna alivyoweza kuiepuka hali hiyo, De Reuck ameeleza kuwa soka lilikuwa sehemu muhimu iliyomsaidia kubadilisha mwelekeo wa maisha yake na kumpa fursa ya kufikia hatua ya kuwa mchezaji wa kulipwa. “Nashukuru Mungu kwa kunipa kipaji cha mpira. Kimenitoa na kuniweka katika ulimwengu tofauti,” aliongeza.
De Reuck, ambaye kabla ya kujiunga na Simba aliwahi kuitumikia Mamelodi Sundowns, amekuwa sehemu muhimu ya kikosi cha Simba tangu kuwasili kwake Tanzania.
