Klabu ya Simba SC imefikia makubaliano na Mashujaa FC juu ya uhamisho wa mshambuliaji Ismail Mgunda, ambaye anatarajiwa kuwasili jijini Dar es Salaam leo kwa ajili ya kukamilisha hatua za mwisho za kujiunga na Wekundu wa Msimbazi.
Mgunda anatarajiwa kuwa miongoni mwa wachezaji wapya watakaoiongezea nguvu Simba katika safu ya ushambuliaji, baada ya klabu hiyo kufikia makubaliano na Mashujaa FC juu ya mauziano ya mshambuliaji huyo.
Taarifa zinaeleza kuwa Mgunda alishiriki katika mazoezi ya mwisho na Mashujaa FC jana, kabla ya kupewa ruhusa na klabu hiyo kusafiri kuelekea Dar es Salaam leo kwa ajili ya kukamilisha uhamisho wake.
Mshambuliaji huyo alikuwa sehemu ya kikosi cha Mashujaa FC kilichoweka kambi ya maandalizi ya msimu jijini Tanga, akishiriki kikamilifu katika programu ya maandalizi ya timu hiyo kuelekea msimu mpya.
Baada ya kuwasili Dar es Salaam, Mgunda anatarajiwa kukamilisha taratibu za mwisho za usajili kabla ya kusubiri utambulisho rasmi wa Simba.
Kwa mujibu wa taarifa, mshambuliaji huyo anatarajiwa kuungana na kikosi cha Simba baada ya mchezo wa Ngao ya Jamii dhidi ya Yanga utakaopigwa leo katika Uwanja wa New Amaan Complex, Zanzibar.
Usajili wa Mgunda unatajwa kuwa mbadala wa mshambuliaji Suleiman Mwalimu ambaye jana aliwa-sapraizi Simba kwa kujiunga na watani zao wa jadi, Yanga.
