Young Africans SC imezindua rasmi mradi mkubwa wa ujenzi wa uwanja wake mpya utakaojengwa eneo la Jangwani, Dar es Salaam, baada ya kuingia makubaliano ya ubia wa umiliki wa uwanja kwa uwiano wa asilimia 50 kwa 50 na GSM Group.
Rais wa Yanga, Injinia Hersi Said, ametangaza hatua hiyo muhimu kwa mabingwa hao wa soka nchini, akieleza kuwa klabu imeingia makubaliano ya kihistoria ambayo yataweka msingi mpya wa maendeleo ya miundombinu ya michezo nchini.
Ubia wa 50-50 kati ya Yanga na GSM Group
Akizungumza katika hafla ya utiaji saini wa makubaliano hayo iliyofanyika Makao Makuu ya Yanga, Jangwani jijini Dar es Salaam, Hersi alisema klabu itatoa ardhi kwa ajili ya mradi huo, huku GSM Group ikichangia uwekezaji wa fedha kwa ajili ya ujenzi wa uwanja wa kisasa.
“Nathibitisha rasmi leo kuwa Young Africans S.C. imeingia katika makubaliano ya ubia wa umiliki wa uwanja wetu mpya kwa uwiano wa asilimia 50 kwa 50 na GSM Group.”
Aidha alieleza kushukuru mchango wa Ghalib Said Mohamed kwa uamuzi wake wa kuweka usawa katika umiliki wa mradi huo mkubwa, licha ya kuwa ndiye anayechangia sehemu kubwa ya uwekezaji wa kifedha.
“Tunamshukuru kwa dhati Ghalib Said Mohamed kwa moyo wake wa kizalendo na uamuzi wake wa kuweka usawa katika umiliki wa mradi huu mkubwa, licha ya kuwa yeye ndiye anayechangia sehemu kubwa zaidi ya uwekezaji wa kifedha.”
Kwa upande wa klabu, Yanga itatoa ardhi huku GSM Group ikiwa mwekezaji mkuu wa fedha kwa ajili ya ujenzi wa uwanja huo wa kisasa.
“Kwa upande wa klabu, Young Africans S.C. itatoa ardhi kwa ajili ya mradi huo, huku mchango wa GSM Group ukiwa ni uwekezaji wa fedha kwa ajili ya ujenzi wa uwanja huo wa kisasa,” alisema Hersi.
Uwanja kukamilika ndani ya miezi 18 hadi 20
Hersi pia alibainisha kuwa mradi wa ujenzi wa uwanja huo unatarajiwa kukamilika ndani ya kipindi cha miezi 18 hadi 20, na kuwa sehemu ya historia mpya ya klabu hiyo kongwe nchini Tanzania.
“Matarajio yetu ni kwamba ujenzi wa uwanja huu utakuwa umekamilika na kuzinduliwa rasmi ndani ya kipindi cha miezi 18 hadi 20 ijayo.”
Aliongeza kuwa klabu ina imani kubwa kuwa mradi huo utakamilika kwa wakati na utakuwa alama muhimu ya maendeleo ya Yanga.
“Tuna imani na matumaini makubwa kwamba mradi huu utakamilika kwa wakati uliopangwa na kuwa sehemu muhimu ya historia ya klabu yetu.”
