Timu ya TRA United imeendeleza kasi yake katika Ligi Kuu Tanzania Bara baada ya kuibuka na ushindi wa mabao 3-0 dhidi ya Tanzania Prisons katika mchezo uliopigwa kwenye Uwanja wa Sokoine mkoani Mbeya.
Katika mchezo huo, TRA United ilionyesha ubora mkubwa tangu dakika za mwanzo hadi mwisho, ikiutumia vyema uwanja wa ugenini kuondoka na alama zote tatu muhimu.
Mabao ya TRA United yalifungwa na Ramadhan Chobwedo, Joseph Akandwanaho na Khamis Mugoya.
Ushindi huo umeisogeza TRA United hadi nafasi ya tano kwenye msimamo wa ligi ikiwa na alama 30, ikiendelea kujiweka katika mazingira mazuri ya kumaliza juu ya jedwali.
Kwa upande wa Tanzania Prisons, kipigo hicho cha nyumbani kimezidi kuiweka pabaya timu hiyo ambayo sasa inashika nafasi ya 15 ikiwa na alama 14 pekee. Hali hiyo inaifanya timu hiyo kuendelea kuwa katika hatari kubwa ya kushuka daraja endapo haitajinasua katika mechi zijazo.
Wakati huohuo, katika mchezo mwingine uliochezwa kwenye Uwanja wa Airtel mjini Singida, timu ya Dodoma Jiji FC ililazimishwa suluhu ya bila kufungana dhidi ya Namungo FC.
Matokeo hayo yanaifanya Dodoma Jiji kuendelea kushika nafasi ya nane, huku Namungo FC ikibaki nafasi ya tisa, timu zote zikiendelea kujikita katikati ya msimamo wa ligi bila presha kubwa ya kushuka daraja wala kuwania ubingwa.
