Klabu ya Simba leo imeingia makubaliano ya udhamini na kampuni ya BETWAY kutoka Uingereza. Mkataba huo wa miaka mitatu una thamani ya Tsh Bilioni 20
Akizungumza katika tukio la kusainiwa mkataba huo liliyofanyika Johari Rotana Hotel jijini Dar es salaam mapema leo, Kaimu Mtendaji Mkuu wa Simba Zubeda Sakuru amesema makubaliano hayo yanakwenda kuleta Mapinduzi kwenye mchezo wa mpira wa miguu hapa Tanzania
"Mkataba ambao tumeingia unakwenda kuleta mapinduzi kwenye mchezo wa soka hapa Tanzania na unakwenda kuongezea nguvu dhamira ya Simba kuwa klabu namba moja barani Afrika"
"Udhamini huu ambao thamani yake ni Bilioni 20 kwa miaka mitatu, unaonyesha namna Simba imedhamiria kuleta mabadiliko ya kuwa klabu kubwa," alisema Sakuru
Nae Mkuu wa Udhamini wa BetWay Afrika, Jason Shield amesema wameichagua Simba kufanya nayo kazi kwa sababu ni timu kubwa barani Afrika, timu inayofahamika katika pande zote la bara hili
"Tumeingia Simba sababu ni timu kubwa Afrika, ni timu ambayo inajulikana pande zote za bara hili na hilo ndio tunaangalia zaidi kwenye biashara. Tulikuwa tukiifatilia kwa miaka karibu sita lakini sasa imekuwa kweli. Tunafuraha kufanikisha jambo hili."
"Huu ni zaidi ya ushirikiano na inatakiwa klabu zote zifaidike na jambo hili. Tunashirikiana na timu nyingi kubwa ambazo tunadhamini hivyo uzoefu huo utatusaidia kufanikisha jambo hili."
"Nina furaha kwa ushirikiano huu lakini tutafanya kazi kuangalia namna gani ya kufanikisha ushirikiano na vilabu vingine vikubwa ambavyo tunashirikiana navyo," alisema
