Klabu ya Stellenbosch iliendeleza mwendo wake mzuri kwenye Ligi Kuu ya Afrika Kusini (DStv Premiership) kwa ushindi wa mabao 1-0 dhidi ya AmaZulu, katika mechi iliyochezwa uwanja wa Moses Mabhida, siku chache kabla ya nusu fainali yao ya kihistoria ya Kombe la Shirikisho la CAF dhidi ya Simba SC.
Bao pekee la mchezo huo lilifungwa na Anicet Oura katika dakika ya 31, baada ya kipa wa AmaZulu, Veli Mothwa, kuokoa mpira wa awali lakini kushindwa kuzuia mpira wa pili.
Kipa wa Stellenbosch, Sage Stephens, alicheza kwa kiwango cha juu, akiokoa penalti ya Sede Dion mapema kipindi cha pili pamoja na kufanya maajabu kwa kuzuia mashambulizi kadhaa ya AmaZulu.
Ushindi huo uliiweka Stellenbosch kwenye nafasi ya juu kwenye msimamo wa ligi na kuongeza rekodi yao ya kutopoteza mechi, jambo ambalo linaongeza morali kuelekea mchezo wao mkubwa barani Afrika.
Wakiwa na morali ya ushindi, Stellenbosch sasa wanaelekeza macho yao kwenye mechi ya kwanza ya nusu fainali ya Kombe la Shirikisho la CAF dhidi ya Simba SC, itakayopigwa Jumapili, Aprili 20, katika Uwanja wa New Amaan Complex, Zanzibar.
Hii ni mara ya kwanza kwa Stellenbosch kufika hatua ya nusu fainali kwenye mashindano ya Afrika, baada ya kuwashangaza wengi kwa kuwatoa Zamalek ya Misri katika hatua ya robo fainali.
Uwanja wa New Amaan Complex, ambao hivi karibuni umeruhusiwa na CAF kuandaa mechi za kimataifa baada ya ukarabati mkubwa, utakuwa jukwaa la pambano hili la kusisimua. Simba na Stellenbosch wote wanatafuta kujiweka kwenye nafasi nzuri kabla ya mchezo wa marudiano.
Kwa kuzingatia mafanikio yao ya hivi karibuni katika ligi ya nyumbani na uchezaji wao thabiti, Stellenbosch inaonekana kuwa tayari kuikabili Simba na kuendeleza safari yao ya kihistoria kwenye soka la Afrika.
