Zikiwa zimepita saa 24 tangu klabu ya Azam Fc itangaze kumfuta kazi kocha Yusuph Dabo na benchi lake la ufundi, takribani makocha 21 wametuma 'CV' Azam Fc kwa ajili ya kumrithi kocha huyo raia wa Senegal
Afisa Habari wa Azam Fc Hashim Ibwe amesema wamepokea maombi kutoka kwa makocha 21 ambapo tayari mchujo wa kwanza umefanyika na kubakisha makocha wanne
Ibwe amesema ndani ya siku mbili watatamtangaza mrithi wa Dabo ambaye atakuwa takribani wiki moja ya kukiandaa kikosi chake kabla ya ratiba ya ligi kuu kuendelea baada ya mapumziko ya kalenda ya FIFA
"Tumepokea maombi kutoka kwa makocha 21, mchujo umefanyika na kubakisha majina ya makocha wanne ambao watapitia katika mchujo mwingine ili kumpata mrithi wa kocha aliyeondoka"
"Kama kila kitu kitakwenda sawa, tutamtangaza kocha mpya ndani ya muda wa siku mbili zijazo"
"Tunataka kocha mpya ajiunge nasi wakati huu ambao ligi imesimama ili apate angalau siku chache za kufanya mazoezi na timu," alisema Ibwe
Jana Azam Fc ilitangaza kumfuta kazi Dabo baada mwanzo mbaya wa msimu
Azam Fc ilichapwa mabao 4-1 na Yanga katika mchezo wa fainali ya Ngao ya Jamii kabla ya kukutana na kipigo cha mabao 2-1 katika mechi mbili za hatua ya awali ya ligi ya mabingwa barani Afrika na matajiri hao kutoka Chamazi kutupwa nje ya michuano mapema
Azam Fc ikaanza ligi kwa kuchechemea ikilazimishwa suluhu ya bila kufungana dhidi ya JKT Tanzania
Miongoni mwa makocha wanaotajwa kuhitajika na Azam Fc ni Florente Ibenge anayeinoa klabu ya Al Hilal ya Sudan
Hivi karibuni Ibenge alikuwa nchini na Al Hilal ambapo walicheza mechi ya kirafiki dhidi ya Simba
