Meneja wa Habari na Mawasiliano klabu ya Simba Ahmed Ali amewataka Wanachama na Mashabiki wa klabu hiyo kuwa watulivu wakati uongozi ukifanya maboresho ya kikosi
Ahmed amesema kipindi hiki ambacho maboresho makubwa yanafanyika, yapo majina ya wachezaji walioachwa yanaweza kuwashtua lakini ni katika 'kuimarisha nyumba'
Wiki iliyopita Simba ilitangaza kuachana na wachezaji watano wakiwemo Saido Ntibazonkiza na Luis Miquissone. Lakini kumekuwa na tetesi kuwa Simba huenda ikampa mkono wa kwaheri kiungo Clatous Chama ambaye mpaka sasa bado hajasaini mkataba mpya
"Naomba msishtuke Wanalunyasi kuona nyumba yenu inabomolewa ili ijengwe mpya na imara zaidi," aliandika Ahmed katika ukurasa wake wa mtandao wa kijamii
Simba imeendelea na michakato ya maboresho ya kikosi ambapo Ahmed amesema wiki hii watakamilisha hesabu za usajili tayari kwa kikosi kuelekea Pre-season wiki ijayo
Simba inakwenda kuweka kambi ya wiki tatu katika Mji wa Ismailia huko Misri
