Mabingwa wa Ngao ya Jamii, Simba wamesema hawana shida yoyote kutokana na uamuzi wao wa kusajili idadi kubwa ya magolikipa kwa sababu imeandaa mikakati maalumu itakayohakikisha wachezaji hao wote wanatumika, imefahamika
Kwa sasa Wekundu wa Msimbazi ina makipa watano na idadi hiyo kubwa imetokana na mashindano mengi yanayowakabili, ikiamini wote watakaa langoni kuitumikia timu hiyo.
Makipa hao ni pamoja na Aishi Manula, Ally Salim, Hussein Abel, Ayoub Lakred na Ahmed Feruzi, aliyepandishwa kutoka katika timu ya vijana ya umri chini ya miaka 20 (U-20).
Meneja wa Habari na Mawasiliano wa Simba, Ahmed Ally, alisema wamegundua moja kati ya sababu ambazo timu zote kubwa zinafanya vizuri kwenye michuano mbalimbali ya kimataifa ni kuwa na makipa wengi ambao ni bora na waliokamilika.
"Siyo dhambi kuwa na makipa wengi, tunataka tuwe na machaguo mengi, pia msimu huu tuna mashindano mengi kwa hiyo ni lazima tuwe nao wengi tena bora, niwakumbushe tu makipa tulionao si wale wa bora liende ni makipa kweli"
"Lakini tukaona twende Morocco kumchukua Ayoub Lakred, hii ni kuonyesha tumedhamiria kufanya vizuri na ukitaka kufanya vizuri ni lazima eneo la kipa lazima liwe zuri kwa asilimia 100, pia tuna kipa chipukizi, Ahmed Feruzi," alisema Ahmed.
Aliongeza usajili wa Lakred, raia wa Morocco ulitokana na Mbrazil, Luis Jefferson kuumia na Hussein alichukuliwa kwa ajili ya kuziba nafasi ya Beno Kakolanya.
"Hatujawasajili makipa wote hao kwa bahati mbaya kama watu wanavyodhani, kila aliyesajiliwa ilikuwa ni kwa sababu maalum na hakuna shida, ila tu kama hali itakwenda vinginevyo tunaweza kumtoa Feruzi, kipa wetu tuliyempandisha kutoka timu ya vijana chini ya miaka 20 kwa mkopo katika klabu nyingine ili aendelee kupata dakika nyingi za kucheza, ni kipa mzuri, tuna mipango naye ya muda mrefu, na kwa uwezo wake anaweza kuwa kipa namba moja katika timu yoyote ile ya Ligi Kuu hapa nchini," Ahmed alisema.
