Wikiendi ya wiki hii, siku ya Jumamosi, Julai 03 mashabiki wa Simba wanaweza kuanza shamrashamra za ubingwa wa nne mfululizo pale uwanja wa Benjamin Mkapa
Ni katika mchezo wa ligi kuu dhidi ya watani zao Yanga ambao utapigwa kuanzia saa 11 jioni
Huu ni mchezo ambao sio tu ushindi utawapa Simba ubingwa, lakini ni mchezo ambao ubingwa unaweza kuwa mtamuuu kwa kuwa umepatikana dhidi ya mtani
Ndio maana kocha mkuu wa mabingwa wa nchi Didier Gomes amesema mchezo huo ni fainali kwa Simba
Pamoja na kutambua kuwa mchezo hautakuwa mwepesi, Gomes amesisitiza Simba inahitaji kushinda, na wanajipanga kuhakikisha wanapata ushindi
"Nafahamu katika soka lolote linaweza kutokea, lakini nikwambie vijana wangu wako imara, tunatakiwa kupambana kuhakikisha tunatangaza ubingwa katika mchezo huo ambao utakuwa wa ushindani mkubwa"
"Ninawaamini wachezaji wangu watafanya yale ya mazoezini, huu ni mchezo muhimu sana kwetu," alisema Gomes
Aidha kocha huyo raia wa Ufaransa amesema mshambuliaji Chris Mugalu amepona majeraha na wamempa program maalum. Anaweza kuwa tayari kushiriki mchezo wa Jumamosi
