Kocha Mkuu wa Simba, Didier Gomes amesema AS Vita wako katika kiwango bora ila anajua ni silaha gani atakayoingia nayo kuwamaliza mapema katika mchezo ujao wa ligi ya mabingwa utakaochezwa Uwanja wa Benjamin Mkapa, Dar es Salaam April 03
Simba wamejipanga kumaliza kazi nyumbani ili mchezo wa mwisho dhidi ya Al Ahly wakacheze wakiwa wamefuzu.
Gomes amesema mchezo huo unaweza kuwa mgumu kutokana na mazingira yake kila timu ikihitaji matokeo ili iweze kusonga mbele hatua ya robo fainali
Aidha amesema AS Vita wamebadilika kulinganisha na walivyokutana nao katika mchezo wa kwanza lakini wanahitaji kwenda na kasi yao ile ile ili kuvuka hatua hiyo
"Ninachoangalia ni hatua ya robo fainali, kama ilivyokuwa kwa michezo iliyopita na hii ni muhimu kwetu kutowadharau wapinzani kwa sababu hivi karibuni wameonesha kiwango kizuri,"; alisema.
Gomes alisema unaweza kuwa mchezo mgumu wenye ushindani ila wao wanahitaji kupata pointi moja tu na lazima wapambane kufa na kupona kuhakikisha wanapata kile wanachokitaka.
Alisema anaamini wachezaji wake watakuwa kwenye kiwango bora na silaha kubwa ni kujiamini na kufanya kile kilichokusudiwa kwa ajili ya kupata matokeo mazuri.
