Beki kisiki wa Simba, Mkenya Joash Onyango, amesema anakaribia kuweka tena rangi nyeupe kwenye ndevu zake ili zionekane ana mvi mithili ya mzee kama alivyowahi kufanya akiwa nchini Kenya
Akizungumza jijini Dar es Salaam jana, Onyango alisema baada ya mechi tatu au nne, ataweka tena rangi nyeupe ndevu zake kwa ajili ya kuwatumia salamu wajukuu zake.
Onyango alifafanua kuwa wajukuu zake ni wale waliokuwa wakimbeza kuwa yeye ni mzee na klabu ya Simba imesajili mchezaji mwenye umri mkubwa.
"Nakaribia kuzirudisha tena ndevu zangu nyeupe, sasa niwe babu kabisa kwa wajukuu zangu, niwatumie salamu," alisema Onyango.
Kabla ya kujiunga na Simba, Onyango alikuwa gumzo akiwa kwenye kikosi cha Harambee Stars ya Kenya, alipoamua kupaka rangi nyeupe ndevu zake na kuonekana kama mzee, na hata alipojiunga na Klabu ya Simba, picha zake hizo zilitumika na mashabiki wengi wakibeza usajili wake.
Wakati Onyango akitaka kurudisha mvi zake, tayari mashabiki wa Tanzania wameshabadilisha mtazamo na kumchukulia kuwa ni mmoja wa mabeki bora kabisa nchini kwa sasa.
Kuhusu hali ya usajili wake kubezwa, Onyango alisema kuwa hawezi kumlaumu mtu yoyote kwani kila mtu ana mtazamo wake.
