Mkuu wa Kitengo cha Habari na Mawasiliano klabu ya Simba Haji Manara, amemzawadia kiungo mshambuliaji Ibrahim Ajibu fedha taslim Tsh Milioni Moja baada ya kuonyesha kiwango bora kwenye mchezo wa raundi ya nne kombe la Shirikisho la Azam (ASFC) dhidi ya African Lyon
Mchezo huo uliopigwa jana katika uwanja wa Benjamin Mkapa, uliwashuhudia mabingwa wa nchi Simba wakiondoka na ushindi wa mabao 3-0 na hivyo kutinga hatua inayofuata kibabe
Ajibu ndiye aliyekuwa nyota wa mchezo huo akiweka kambani mabao mawili huku akionyesha kiwango bora
Manara alieleza kuvutiwa na uwezo alioonyesha Ajibu na kuamua kumtuza kiasi hicho cha fedha
"Hivi ndivyo Wanasimba wanataka. Ibrahim Ajibu soma muamala wako kuna kamilioni nimekasendi kwenye Simu yako. Nimekutumia na ya kutolea," aliandika Manara kwenye ukurasa wake wa mtandao wa kijamii
Baadae Ajibu alithibitisha kupokea kiasi hicho cha fedha; "Bugatti Nimeshapokea muamala. Shukrani sana kaka"
Ajibu amekosa nafasi ya kudumu kwenye kikosi cha Simba, hata hivyo amefanya vizuri kila alipopewa nafasi
