Inaelezwa klabu ya Al Ahly inajipanga kuwasilisha ofa nono kwa klabu ya Simba wakitaka kumsajili winga Luis Miquissone
Miquissone alikuwa mwiba mkali dhidi ya wababe hao wa soka barani Afrika juzi, akifunga bao pekee lililoihakikishia Simba kuondoka na alama zote tatu baada ya ushindi wa bao 1-0 katika mchezo uliopigwa uwanja wa Benjamin Mkapa
Kama mpango huo utakamilika Simba inatarajiwa kuvuna kitita kikubwa cha fedha
Msemaji wa Simba Haji Manara amesema klabu haitakuwa na kinyomgo kumuacha nyota huyo aondoke kama watapokea ofa nono
"Mpira ni kazi yake, sisi hatuwezi kumzuia kama itatokea timu ikampa maslahi zaidi kuliko sisi. Lakini hata hivyo kwa sasa Miquissone ni mchezaji ghali sana hivyo kwa yeyote anayetaka kumsajili inabidi ajipange sawasawa," alisema Manara
Aidha bosi huyo wa kitengo cha habari klabu ya Simba, amesema sio Al Ahly tu, wamepokea ofa kutoka timu nyingine ndani ya Afrika na hata nje ya bara la Afrika
Tangu ajiunge na Simba mwishoni mwa mwaka uliopita, Miquissone amekuwa katika kiwango bora
