Mshambuliaji wa zamani wa Yanga Amis Tambwe, bado ana ndoto ya kurudi kuwatumikia mabingwa hao wa kihistoria akibainisha kuwa yuko tayari hata kucheza bure
Tambwe ambaye aliitumikia Yanga kwa misimu minne yenye mafanikio, amesema heshima aliyoitengeneza wakati akiwa na klabu hiyo, imemfanya ajihisi kuwa bado ana deni kubwa kwa Wanajangwani hao
"Yanga imenipa heshima kubwa sana na ilinifuta machozi pale nilipokuwa na maumivu, sina ambacho naweza kuwalipa zaidi ya kuwa tayari kufanya nao kazi"
"Nitafurahi nikipata nafasi nyingine ya kuitumikia Yanga kwa sababu imenipa historia kubwa na kubadili maisha yangu, natamani wanipe nafasi ya kucheza hadi nitakapostaafu mpira hata kwa kujitolea tu," Tambwe amenukuliwa na gazeti la Bingwa
Tambwe alijiunga na Yanga katika usajili wa dirisha dogo msimu wa 2014/15 wa Ligi Kuu Bara baada ya kutemwa na Simba dakika za mwisho
Alitoa mchango mkubwa katika misimu yote mitatu ambayo Yanga ilitwaa taji la ligi kuu mfululizo kuanzia 2014 mpaka 2017
Majeraha aliyopata mwaka 2017, yalimfanya akae nje kwa muda mrefu hali iliyopelekea kuathiri kiwango chake kwa kiasi kikubwa
Msimu wake wa mwisho alifunga mabao nane kwenye ligi. Hata hivyo aliyekuwa kocha mkuu wa Yanga Mwinyi Zahera alimnyima mkataba mpya hivyo kumfanya aondoke akiwa mchezaji huru
