Bao la dakika ya 77 lililofungwa kwa mkwaju wa penati na Meddie Kagere 'MK14' limetosha kuihakikishia Simba ushindi muhimu katika mchezo wa ligi kuu dhidi ya KMC uliopigwa uwanja wa Benjamin Mkapa
Mwamuzi Elly Sassie alitoa mkwaju wa penati baada ya winga wa KMC Hassan Kabunda kuunawa mpira ndani ya eneo la hatari
Simba iliingia katika mchezo huu ikihitaji alama tatu. Kipindi cha kwanza Simba ilikuwa bora lakini haikuwa katika kasi ambayo mashabiki wameizoea
Akiwa na hesabu za mchezo wa ligi ya mabingwa dhidi ya Platinum Fc, kocha Sven Vandenbroeck alifanya mabadiliko wakati wa mapumziko akiwatoa nahodha John Bocco na mlinda lango Aishi Manula na nafasi zao kuchukuliwa na Kagere na Beno Kakolanya
Sven ameendelea kuuamini mfumo wake wa kutumia mshambuliaji mmoja licha ya ukosoaji anaopata kutoka kwa wadau wa Simba
Muhimu zaidi mabingwa wameendelea kusogea juu kileleni sasa wakifikisha alama 32, alama tano nyuma ya Yanga ambayo pia imecheza mchezo mmoja zaidi
Simba haitakuwa na mchezo wa ligi wikiendi hii kwani wanatarajiwa kusafiri nchini Zimbabwe tayari kwa mchezo dhidi ya Platinum Fc ambao utapigwa Disemba 22
