Mabingwa wa nchi Simba tayari wako ndani ya Mji wa Sumbawanga wakihesabu masaa kuelekea mchezo wa ligi kuu dhidi ya Tanzania Prisons ambao utapigwa kesho Alhamisi kwenye uwanja wa Nelson Mandela
Simba itaingia katika mchezo huu ikiwa na hesabu ya kuondoka na alama zote tatu ili kuhakikisha wanasogea karibu ya vinara Azam Fc ambao wanaonekana kuwa 'wamoto' msimu huu
Azam Fc inaongoza ligi ikiwa na alama 21 baada ya kushinda michezo yake yote saba
Ni alama nane juu ya Mabingwa watetezi Simba wenye alama 13 lakini pia wakiwa na mechi mbili mkononi
Afisa Habari wa Simba Haji Manara amesema wanafahamu mchezo dhidi ya Prisons hautakuwa mwepesi lakini kama mabingwa, wana kila sababu ya kushinda mchezo huo
"Mchezo wetu wa Oktoba 22 dhidi ya Tanzania Prisons sio mwepesi kwani tunakutana na timu ngumu na yenye wachezaji wapambanaji muda wote.
"Unajua timu za majeshi zenyewe muda wote zipo fiti hapo unaweza kujua Simba tunakwenda kukutana na timu ya aina gani.
"Kwa kuwa sisi ni mabingwa watetezi basi lazima tuingie kibingwa na tucheze tukiwa ni mabingwa watetezi, mashabiki wetu watupe sapoti ili timu ipate matokeo kwani tunahitai ushindi," alisema Manara
Kocha Mkuu Sven Vandenbroeck ataingia katika mchezo huo huku akiwakosa baadhi ya nyota wake muhimu kutokana na sababu mbalimbali
Washambuliaji Meddie Kagere na John Bocco ni majeruhi wakati kiungo Clatous Chama na beki Paschal Wawa walipewa ruhusa kurejea katika nchi zao kuhuisha paspoti zao
