Mshambuliaji wa Simba, Chris Mugalu, amesema wanakwenda mkoani Rukwa kupambana na kupata ushindi katika mchezo wao wa Ligi Kuu Tanzania Bara dhidi ya Prisons utakaochezwa keshokutwa kwenye Uwanja wa Mandela, mjini Sumbawanga.
Mcongomani huyo aliyetua Simba akitokea klabu ya Lusaka Dynamos ya Zambia, amesema anatambua mchezo huo utakuwa mgumu kutokana na ubora wa wapinzani wao hao, japo hilo haliwezi kuwazuia kupata ushindi.
"Tunajua mchezo utakuwa mgumu, wenyeji wetu watapambana, nasi tunakwenda kupambana tupate ushindi ambao utatuweka katika nafasi nzuri ya kuendelea kupigania ubingwa wetu wa ligi," alisema Mugalu.
Aidha, Mugalu alisema kuwa anafurahi kucheza katika Ligi ya Tanzania ambao ni miongoni mwa ligi zenye ushindani mkali unaosaidia kuwa na wachezaji wengi wazuri.
"Nimefurahia kuona ligi ina ushindani mkali, kila timu inapambana ipate matokeo, nami na wachezaji wenzangu tunaipambania timu yetu ya Simba iweze kufanya vizuri na hatimaye kutwaa ubingwa"
Mugalu anatarajiwa kuongoza safu ya ushambuliaji ya Simba kwenye mchezo huo Meddie Kagere na John Bocco ikielezwa watakosekana kutokana na kuwa majeruhi
Nyota wengine wanaoweza kukosa mchezo huo ni pamoja na Mzambia Clatous Chama na Paschal Wawa ambao walipewa ruhusa kurejea katika nchi zao kuhuisha vibali vyao
Aidha beki Ibrahim Ame naye anatajwa kukabiliwa na matatizo ya kifamilia
