Kocha Mkuu wa mabingwa wa soka Tanzania Bara Simba Sven Vandenbroeck amesema kikosi chake kiko tayari kwa mchezo wa ufunguzi wa ligi kuu ya Vodacom ambao utapigwa kesho Jumapili kwenye uwanja wa Sokoine, mkoani Mbeya
Simba iliweka kambi ya siku nne mkoani Mbeya, leo imekamilisha maandalizi yake ya mwisho tayari kwa mchezo
Sven amesema wamefanya maandalizi ya kutosha huku akibainisha kuwa anatarajia kupata upinzani mkali kutoka kwa vijana hao wa Ihefu waliopanda daraja msimu uliopita
"Siku zote mechi ya kwanza ya ligi ni ngumu sababu kila mmoja anataka kuonyesha uwezo wake na hasa wanapocheza na Simba.
"Sisi tumejiandaa na wachezaji wote ambao tumekuja nao Mbeya wapo tayari kwa mchezo. Tumejipanga kufanya kazi yetu ikiwezekana kuwashinda na kuanza ligi na alama tatu," amesema Sven
Mabingwa hao watetezi kesho wanaianza kampeni ya kuwania ubingwa wa nne mfululizo
