Msanii nyota wa muziki hapa nchini, Naseeb Abdul ‘Diamond’ ambaye ni shabiki wa Simba, ameahidi kuitungia wimbo maalum klabu hiyo baada ya kutwaa ubingwa wa Ligi Kuu Tanzania Bara kama sehemu ya kudhihirisha mapenzi yake kwa Wekundu wa Msimbazi hao.
Sambamba na hilo, mkali huyo wa muziki, ameahidi kuifuata timu hiyo mjini Sumbawanga, mkoani Rukwa, itakapocheza na Namungo FC wiki ijayo katika mchezo wa fainali ya Kombe la Shirikisho la Azam Sports (ASFC) kwenye Uwanja wa Nelson Mandela.
Akizungumza jijini Dar es Salaam juzi, Diamond alisema:
"Kila mtu anajua kama naipenda timu yangu ya Simba na sio kuipenda tu, bali binafsi ni shabiki mkubwa wa timu hiyo na sio kwa sababu najiita Simba, ni shabiki kabisa wa damu.
"Natamani sana kuwepo katika uwanjani katika mechi hiyo (fainali ya ASFC), napenda kusapoti, muda ukiruhusu nitakuwepo kuisapoti timu yangu kwa kuwa ina kikosi imara nina uhakika watashinda.
"Simba wakishinda (dhidi ya Namungo), nitawatungia wimbo maalum kwaajili yao, wachezaji na mashabiki wa timu hiyo, ndio uwezo nilionao wa kuwaonyesha mapenzi yangu"
