Washambuliaji wa Simba nahodha John Bocco na Meddie Kagere wanaweza kuanza pamoja kesho kwenye mchezo wa nusu fainali kombe la FA dhidi ya Yanga ambao utapigwa uwanja wa Taifa
Baada ya kukabidhiwa ubingwa wa ligi kuu, mabingwa hao wa nchi wana kazi moja tu kesho, kuhakikisha wanawafunga watani zao ili kunogesha shamrashamra za ubingwa
Afisa Habari wa Simba Haji Manara amesema wamefurahi baada ya kutwaa ubingwa kwa msimu wa tatu mfululizo lakini watafurahi zaidi kama watashinda dhidi ya Yanga
Mwaka 1977 mkongwe Abdallah Kibaden aliweka rekodi ya kufunga mabao matatu 'hat-trik' katika mchezo ambao Simba iliifunga Yanga mabao 6-0
Rekodi hiyo haikuwahi kuvunjwa mpaka wakati huu. Wakati Simba ya sasa inaangaliwa kama moja ya kikosi bora cha muda wote, mashabiki wana shauku ya kuona wanavunja rekodi ya ushindi wa mabao sita iliyowekwa na kina Kibaden
Lakini pia Bocco na Kagere wanaweza kubakia kwenye kumbukumbu vya klabu ya Simba kwa vizazi vijavyo kama wataweza kuifikia rekodi ya Kibaden ambayo inahitaji kuvunjwa baada ya kubakia kwa muda mrefu
