Kiungo raia wa Brazil Gerson Fraga kwa mara nyingine amedhihirisha kuwa anastahili kuendelea kubaki na mabingwa hao wa nchi baada ya kuonyesha kandanda safi kwenye mchezo wa robo fainali kombe la FA dhidi ya Azam Fc
Mchezo huo uliopigwa jana uwanja wa Taifa na kuishuhudia Simba ikicheza kandanda la kitabuni na kuondoka na ushindi wa mabao 2-0, Fraga alicheza kiungo mkabaji 'pacha' na Jonas Mkude
Hata hivyo kocha Sven Vandenbroeck alimpa kazi moja tu, kuvuruga mipango ya Azam Fc pamoja na kukaba na kumpa Mkude uhuru wa kusambaza 'pasi za upendo'
Wengi wanajiuliza ilikuwaje Azam Fc pamoja na ubora wao jana walipoteana mbele ya Simba iliyokuwa imenawili kila mahali? ni kutokana na mbinu hii iliyotumiwa na Sven ambapo Mkude na Chama hawakuwa na majukumu makubwa ya kukaba hivyo kuwafanya wachezeshe timu
Fraga alikuwepo kila mahali, alikaba, alipiga pasi na alifanya kazi zote 'chafu' ambazo kiungo mkabaji anapaswa kuzifanya. Fraga ni aina ya wachezaji ambao akielekezwa kazi anaifanya kwa ufasaha mkubwa
Itashangaza kama uongozi wa Simba hautamuongeza mkataba mwamba huyu aliyewahi kuwa nahodha wa akina Neymar kwenye timu ya Taifa ya vijana wa Brazil umri chini ya miaka 15
