Kocha Mkuu wa Simba Sven Vandenbroeck amefichua mpango wa kupangua kikosi kwenye mchezo wa ligi kuu dhidi ya Mwadui Fc ambao utapigwa keshokutwa Jumamosi kwenye uwanja wa Taifa
Baada ya ligi kurejea, Simba imeanza kwa kusuasua ikilazimishwa sare ya bao 1-1 dhidi ya Ruvu Shooting, matokeo ambayo hayakutarajiwa
"Kiukweli kudondosha pointi mbili nyumbani hayakuwa matarajio yetu na shida moja wapo ambayo ilichangia hilo ni wachezaji wangu baadhi kuniangusha jambo ambalo litanifanya kubadili baadhi yao katika mchezo unaokuja"
"Hatuwezi kusema ni kina nani kwani tulicheza kama timu lakini katika mechi na Mwadui utaona baadhi ya mabadiliko ambayo nitayafanya," alisema Sven kwenye mazoezi ya kikosi cha Simba yanayoendelea uwanja wa Mo Simba Arena
Aidha Mbelgiji huyo amesema pia wamesahihisha makosa waliyoyabaini katika mchezo uliopita hivyo kuwa na matumaini ya kufanya vizuri Jumamosi
"Mchezo uliopita tulifanya makosa mengi, tumefanya kazi kubwa kuhakikisha tunayarekebisha hivyo Jumamosi hatutarajii kurudia makosa hayo. Nafikiri tutakuwa na mchezo mzuri ambao utawapa furaha mashabiki wetu," aliongeza Sven
Simba imepania kuondoka na alama zote tatu kabla ya safari ya mkoani Mbeya kuzifuata Mbeya City na Tanzania Prisons
