Mkufunzi wa klabu ya Simba Sven Vandenbroeck amesema vilabu vinahitaji angalau wiki tatu za mazoezi ili kujiweka sawa kabla ya mechi za lala salama kuanza kutimua vumbi
Simba imeanza rasmi mazoezi jana jioni, chini ya kocha Sven na Selemani Matola
Kocha huyo wa zamani wa timu ya Taifa ya Zambia, amesema wachezaji wamekaa nje kwa zaidi ya miezi miwili bila ya kucheza mpira, hivyo muda utahitaji ili kuwarejesha katika hali ya ushindani waliokuwa nao awali
"Miezi miwili bila ya kucheza mpira ni muda mrefu sana. Nadhani tutahitaji angalau wiki tatu kufanya mazoezi ya pamoja kabla ya kuanza kucheza mechi za ushindani. Hili ni muhimu pia katika kulinda afya za wachezaji," alisema Sven muda mfupi baada ya kumaliza mazoezi uwanja wa Mo Simba Arena jana jioni
Wakati Sven akitoa pendekezo hilo, taarifa za awali zinadai huenda mechi za ligi kuu zikaanza kupigwa Juni 15
