Baada ya Bodi ya Ligi kubainisha kuwa tayari imepeleka mapendekezo kwa Serikali kuhusu utaratibu watakaotumia kumalizia mechi zilizobaki ligi kuu ya Vodacom, uongozi wa Simba unajipanga kuwarudisha wachezaji wake wa kigeni ambao wako nje ya nchi
Ligi Kuu huenda ikaanza kutimua vumbi mwezi Juni kumaliza raundi 10 zilizosalia baada ya Rais wa nchi Dk John Magufuli kubainisha kuwa anafikiria kutoa ruhusa ligi hiyo iendelee
Baadhi ya wachezaji wa kigeni ambao waliitwa kujiunga na timu za Taifa mwezi wa tatu, walishindwa kurejea nchini baada ya nchi zao kufunga mipaka huku nyingine zikisitisha safari za ndege za Kimataifa kutokana na janga la corona
Mtendaji Mkuu wa Simba Senzo Mazingisa amesema wanafikiria utaratibu wa kuweza kuwarudisha wachezaji hao mapema ili waweze kuungana na wenzao ambao wako nchini
"Tunasubiri ni lini timu zitaruhusiwa kuanza mazoezi lakini tunaangalia namna ambavyo tunaweza kufanya mchakato wa kuwarudisha wachezaji wetu ambao wako nje ya nchi tangu mechi za timu za Taifa zilipofutwa," amesema Senzo
Miongoni mwa wachezaji ambao wako nje ya nchi ni mshambuliaji Meddie Kagere, kinara wa mabao kwenye ligi kuu ya Vodacom akiwa ametupia kambani mabao 19
Wengine ni Clatous Chama, Francis Kahata, Sharaff Shiboub na Luis Miquissone aliyejiunga na Simba mwezi Januari
