Rais wa shirikisho la soka la Kenya (FKF) Nick Mwendwa ameitangaza Klabu ya Gor Mahia kuwa mabingwa wa nchi hiyo kufuatia uwezekano wa kurejea kwa ligi kuu kuwa ngumu kutokana na Janga la kidunia la Corona
Mwendwa amesema ni ngumu kupanga ratiba ya mechi 11 zilizobaki kwa sasa kwa kuwa haijulikani lini hali itatengemaa
"Tumetumia kanuni tulizoanza nazo za ligi ambazo zinasema, ikiwa timu zimecheza karibu Asilimia 75 za mechi na kisha ligi kushindwa kumalizika kwa sababu maalum, msimamo utabaki kama ulivyo kwa wakati huo," amesema
Hata hivyo Bodi ya Ligi hiyo imepinga uamuzi uliochukuliwa na FKF wakidai kuwa hawana mamlaka ya kuitangaza Gor Mahia kuwa bingwa
Bodi hiyo inadai kuwa bado ni mapema, wamaamini muda wa kuchezwa mechi zilizosalia utapatikana baada ya changamoto ya corona kwisha
Pengine uamuzi kama huo huenda ukachukuliwa hapa nchini kwani bado kuna idadi kubwa ya maambukizi ya corona huku Serikali ikisubiriwa kutoa mwongozo kuhusu hatma ya ligi kuu
