Licha ya kuhusishwa na timu nyingi kutaka kumsajili kinara wa mabao Ligi Kuu Bara, Mnyarwanda Meddie Kagere, ambaye mkataba wake na Simba unaelezwa kumalizika msimu huu, wakala wa mshambuliaji huyo, Patrick Gakumba amewatuliza mashabiki wa timu hiyo baada ya kueleza kuwa tayari mazungumzo na Simba ili kumuongeza mkataba mpya yamekamilika
Mshindi huyo wa kiatu cha dhahabu Ligi Kuu Bara msimu uliopita, hadi ligi hiyo inasimama msimu huu yupo kileleni mwa orodha ya wafungaji akiwa na mabao 19 wakati huu Simba ikiwa imebakiza mechi 10 kabla ya ligi kumalizika
Gakumba amesema Kagere ataendelea kubaki Msimbazi, kinachosubiriwa ni kuja kusaini mkataba mpya
"Ni kweli mkataba wa Kagere unamalizika, lakini tumeshafanya mazungumzo na kukubaliana na kilichobaki ni kuja kuchukua mamilioni kutoka kwa Mo, kinachotuzuia ni kutokana na mipaka ya nchi kufungwa baada ya kuibuka mlipuko wa virusi vya corona," alisema.
Gakumba alisema Mo hawezi kushindwa kumbakisha mchezaji huyo anayeongoza kwa mabao Ligi Kuu na kwamba kila kitu wameshakubaliana.
Awali kulikuwa na tetesi kuwa klabu ya APR ilikuwa ikimuwania kinara huyo wa mabao lakini jana uongozi wa APR ulikanusha
