Wiki iliyopita Kocha Mkuu wa Simba, Sven Vandenbroeck, alimtaja mchezaji anayemkosha katika Ligi Kuu Tanzania ambaye si mwingine bali ni kiungo wa Namungo FC, Lucas Kikoti.
Sven alimtaja mchezaji huyo, Jumamosi iliyopita wakati alipokuwa akijibu maswali ya mashabiki wa soka kupitia mitandao ya kijamii ya Simba.
Kati ya maswali aliyoulizwa ni kumtaja mchezaji aliyemvutia kutoka timu alizocheza nazo tangu ametua katika ardhi ya Tanzania ambapo bila kusita, alimtaja Kikoti.
Sven alisema mchezaji huyo alimwangalia vizuri katika mechi waliyokutana na Namungo ambayo Simba iliibuka na ushindi wa mbao 3-2 kwenye Uwanja wa Taifa, jijini Dar es Salaam.
Alisema katika kumwangalia nyota huyo, alibaini ni kati ya wachezaji waliojaaliwa kipaji cha hali ya juu, akitolea mfano bao alilowafunga kuwa lilidhihirisha ubora na umakini wake.
