Mabingwa wa nchi Simba leo wametoa onyo kali kwa timu nyingine zinazoshiriki ligi kuu ya Vodacom baada ya kuifumua Mtibwa Sugar mabao 3-0 katika mchezo uliopigwa uwanja wa Jamhuri
Mchezo huo uliohudhuriwa na mamia ya mashabiki wa soka wa mkoani Morogoro na maeneo ya jirani, uliishuhudia Simba ikicheza kandanda safi huku wakiwa bora zaidi mbele ya lango la Mtibwa Sugar
Kalamu ya mabao kwa upande wa Simba ilianza kwenye dakika ya 45 ya mchezo, nahodha John Bocco akiitanguliza Simba kwa bao safi baada ya kupokea pasi ya Meddie Kagere ambaye hilo ni bao lake la sita kutengeneza
Dakika mbili baada ya kuanza kipindi cha pili, Mohammed Hussein aliifungia Simba bao safi la kideoni akifunga akitokea pembezoni mwa lango la Mtibwa
Simba iliendelea kulishambulia lango la Mtibwa Sugar kama nyuki na Hassan Dilunga akaweka kambani bao la tatu kwenye dakika ya 59 akimalizia pasi murua ya Clatous Chama
Ulikuwa mchezo ambao Simba ilidhihirisha kuwa bado inao ubora wake, pengine suala la uchovu linaweza kuwa lilichangia kucheza chini ya kiwango katika michezo iliyopita
Mlinda lango Aishi Manula leo alirejea kikosini na hakika alidhihirisha bado anastahili kuwa kipa namba moja wa Simba
Baada ya mchezo huo Simba itaelekea mkoani Iringa kuifuata Lipuli Fc
