Mabingwa wa soka Tanzania Bara Simba leo wanashuka uwanja wa Taifa kuikaribisha Coastal Union katika mchezo wa ligi kuu ya Vodacom
Baada ya kuibuka na ushindi kwenye michezo yote minne iliyopita, Simba watakuwa na nafasi ya kuzidi kujikita kileleni kwani mpaka sasa wamejikusanyia alama 44, alama nane zaidi ya Azam Fc inyowafuata nafasi ya pili
Kuelekea mchezo huo ambao utapigwa saa kumi jioni, kocha Mkuu wa mabingwa hao wa nchi Sven Vandenbroeck anatarajiwa kufanya mabadiliko ya kikosi chake kilichocheza mchezo dhidi ya Namungo Fc
Sven amesema mchezo uliopita hawakucheza vizuri kwa kuwa baadhi ya wachezaji wake walikuwa wamechoka huku akibainisha kuwa wapo ambao hawawezi kucheza mechi nyingi mfululizo
Mabadiliko makubwa pengine yanaweza kuonekana kwenye safu ya ulinzi ambayo kwa siku za karibuni imeingia lawamani kutokana na kuruhusu mabao mfululizo
SImba itaingia kwenye mchezo huo ikiwa na kumbukumbu ya kushinda mabao 8-1 kwenye mchezo wa mwisho ambao ulizikutanisha timu hizo uwanja wa uhuru msimu uliopita
