Jana Mahakama ya Hakimu Mkazi Kisutu iliwapa dhamana aliyekuwa Rais wa Klabu ya Simba, Evans Aveva na aliyekuwa makamu wake, Geofrey Nyange 'Kaburu' baada ya kuondolewa mashitaka ya utakatishaji fedha
Aveva na Kaburu wamekuwa ndani tangu mwaka 2017 walipokamatwa.
Dhamana hiyo ni kuwa na wadhamini wawili watakaosaini bondi ya Sh.Milioni 30, ambapo hatua hiyo inatokana na washitakiwa hao kukutwa na kesi ya kujibu katika mashitaka 7 isipokuwa mawili ya utakatishaji fedha
Hata hivyo washitakiwa hao walishindwa kutimiza masharti ya dhamana hivyo kurudishwa mahabusu ambapo kesi hiyo itaendelea leo Septemba 20, 2019 kwa ajili ya washitakiwa hao kuanza kujitetea akiwemoaliyekuwa Mwenyekiti wa Kamati ya Usajili, Zacharia Hanspope
Hakimu wa Mahakama ya Hakimu Mkazi Kisutu jijini Dar es salaam, Thomas Simba alisema baada ya kupitia ushahidi wa mashahidi 10 wa upande wa mashitaka ambapo amewakuta na kesi ya kujibu washitakiwa hao katika kosa la 1,2,3,4,7,8 na 9 isipokuwa katika shitaka la 6 na 10 ambayo ni ya utakatishaji fedha
Shitaka la kwanza Aveva na Kaburu wanadaiwa kula njama na kutenda kosa la matumizi mabaya ya madaraka
Katika shitaka la pili la Aveva na Kaburu wanadaiwa kutumia vibaya madaraka yao kwa kuandaa fomu ya kuhamisha fedha Dola za Marekani 300,000 kutoka kwenye akaunti ya Simba iliyoko benki ya CRDB Azikiwe kwenda kwenye akaunti binafsi ya Aveva iliyoko benki ya Barclays.
Shtaka la tatu linalowakabili Aveva na Kaburu inadaiwa kwa pamoja walighushi nyaraka iliyokuwa ikionesha Simba inalipa mkopo wa Dola za 300,000 kwa Aveva kitu ambacho sio kweli
Katika shtaka la nne Aveva katika banki ya CRDB anadaiwa kutoa nyaraka ya uongo ikionesha Simba wanalipa mkopo wa Dola za Marekani 300,000
Shtaka la tano, Aveva anadaiwa kuwa katika Benki ya Baclays Mikocheni alijipatia Dola za Marekani 187,817 wakati akijua zimetokana na kughushi
Shitaka la sita, Kaburu anadaiwa kumsaidia Aveva kujipatia Dola za Marekani 187,817 kutoka kwenye akaunti ya Simba wakiwa wanajua fedha hizo zimetokana na zao la kughushi
Shitaka la saba linawakabili Aveva, Kaburu na Hanspoppe ambao wanadaiwa kughushi hati ya malipo ya kibiashara wakionesha kwamba nyasi bandia zilizonunuliwa na Simba zina thamani ya Dola za Marekani 40,577 huku wakijua kwamba siyo kweli.
Katika shitaka la nane, Aveva anadaiwa kuwasilisha hati ya malipo ya kibiashara ya uongo kwa Levison Kasulwa kwa madhumuni ya kuonesha kwamba Simba wamenunua nyasi bandia zenye thamani ya Dola za Marekani 40,577
Shitaka la tisa, Aveva, Kaburu na Hanspope wanadaiwa kuwasilisha nyaraka za uongo kuonesha kuwa Simba imenunua nyasi bandia zenye thamani ya Dola za Marekani 40,577.
