Mchezo wa marudiano ligi ya mabingwa barani Afrika kati ya Simba dhidi ya UD Songo umemalizika kwa sare ya bao 1-1 matokeo yaliyowavusha UD Songo kutinga hatua inayofuata
Ni matokeo ya kushtua ambayo yamewauma mashabiki wote wa Simba, lakini ndio mpira, wakati mwingine mambo yasiyotarajiwa hutokea
Simba iliuanza mchezo taratibu na pengine ndio kosa lililofanyika kwani UD Songo walihitaji bao la ugenini mapema kitua ambacho walikifanikisha
Na hata baada ya Simba kurejea mchezoni, haikuwa rahisi kuipenya ngome ya UD Songo huku washambuliaji wakishindwa kutumia nafasi nyingi walizotengeneza
Bao la kusawazisha kwa Simba lilifungwa na nahodha wa mchezo Erasto Nyoni kwa mkwaju wa penati baada ya Miraji Athumani kufanyiwa madhambi ndani ya eneo la hatari
Simba sasa inarejea kwenye mikikimikiki ya ligi kuu lengo kuu sasa likiwa kutetea ubingwa wake kwa msimu wa tatu mfululizo
