Beki Kennedy Juma aliyetua Simba kutoka klabu ya Singida United amewataka mashabiki wa timu hiyo kutulia, wasubiri kazi yake uwanjani
Usajili wa Kennedy ambao ulipendekezwa na kocha Patrick Aussems, ulipokewa tofauti na baadhi ya mashabiki wa Simba ambao wanaamini timu hiyo ilihitaji beki imara zaidi atakayeisaidia kwenye michuano ya ligi ya mabingwa
Hata hivyo Kennedy aliyeitumikia Simba kwa mara ya kwanza kwenye mchezo wa kirafiki dhidi ya Gwambina Fc jana, anaamini mashabiki hao wataikubali kazi yake
"Kikubwa ni kumuomba Mungu atujalie afya, nina amini watashangaa, nitapambania namba kwa sababu ushindani najua utakuwa mkali kwahiyo wasubiri tukutane uwanjani”
Beki huyo aliongeza kuwa kujiunga na mabingwa hao ni kama njia ya kujitangaza zaidi kwani timu yake inashiriki michuano ya kimataifa ya Ligi ya Mabingwa Afrika.
Alisema moja ya mkakati wake ni kuhakikisha anatumia vyema nafasi atakayopata chini ya Kocha Patrick Ausesms ili kufikia malengo ya kazi yake hiyo.
"Mashabiki wategemee vitu vizuri, Simba ni timu kubwa inayojiandaa na michuano ya kimataifa kwahiyo lazima nitumie nafasi hiyo kuonyesha uwezo mkubwa kufikia malengo yangu"
Simba imemsajili Kennedy kuimarisha safu yake ya ulinzi. Inaelezwa mabingwa hao wa Tanzania Bara watasajili beki mwingine wa kigeni ambaye ataungana na Kennedy pamoja na walinzi waliopo kuunda ukuta mpya wa Simba
