Kikosi cha Simba kimeendelea na mazoezi jana kwenye uwanja wa Boko Veterans ikiwa ni maandalizi ya viporo vya ligi kuu na mchezo muhimu wa robo fainali michuano ya ligi ya mabingwa barani Afrika dhidi ya TP Mazembe
Kuelekea mchezo huo dhidi ya TP Mazembe, Simba inaandaa mkakati wa kuhakikisha inapata matokeo ya kuipeleka hatua ya nusu fainali
Mtendaji Mkuu wa Simba, Crescentius Magori amesema wanahitaji kufanya vizuri katika mchezo huo
Amesema viongozi watakutana kupanga mkakati wa kuhakikisha wanaivusha Simba kwenda hatua ya nusu fainali
"Kupitia kikao hicho, tutapanga mkakati wetu ingawa timu tayari ilianza maandalizi yake tangu hatua ya awali mpaka hapa tulipofikia," amesema Magori
"Niwahakikishie Wanasimba wote kwamba sisi viongozi hatulali na badala yake tunafanya kila linalowezekana kushinda, hata sasa tulisubiri mchezo wa Stars dhidi ya Uganda umalizike, tukutane tena," alisema Magori.
Simba imepata ushindi katika michezo yake yote ya ligi ya mabingwa iliyopigwa katika dimba la Taifa kwenye hatua ya makundi lakini ikapoteza ya ugenini kwa kufungwa jumla ya mabao 12
Magori amesema watahakikisha hawarudii makosa ya kufungwa mabao mengi ugenini huku akitilia mkazo ushindi kwenye mchezo wa kwanza utakaopigwa uwanja wa Taifa April 05 2019
