Ni faraja kuona mwekezaji wa klabu ya Simba Mohammed Dewji 'MO' kwa kushirikiana na uongozi wa klabu hiyo mara moja wamechukua hatua ya kukiimarisha kikosi kinachoshiriki michuano ya ligi ya mabingwa barani Afrika
Mchezo dhidi ya AS Vita Club umetoa taswira ya ugumu wa michuano hiyo hasa kwa michezo ya ugenini.
Ili Simba iweze kufuzu hatua ya robo fainali na pengine kuwaza kutwaa ubingwa kuna ulazima wa kuboresha kikosi chake
Jana Simba imeshusha wachezaji wawili kutoka nchi za Ghana na Togo huku ikielezwa mchezaji mwingine kutoka Namibia yuko njiani
Wachezaji hao ni beki wa kati, Mghana Moro Lamine na straika Mtogo Hunlede Kissimbo Ayi na walianza kufanya mazoezi na Simba jana Jumatatu jioni katika Uwanja wa Boko Veterans jijini Dar es Salaam
Kama watafuzu majaribio, wawili hao wanaweza kuongezwa katika kikosi kinachoshiriki michuano ya ligi ya mabingwa mwaka huu
Kwa mapungufu yaliyoonekana katika mchezo dhidi ya Vita, hakuna ubishi kuwa Simba inahitaji kuboresha safu yake ya ulinzi pamoja na kuiongezea nguvu safu yake ya ushambuliaji
Ikumbukwe pia bado hatma ya mshambuliaji wake tegemeo Emmanuel Okwi anayewaniwa na Kaizer Chiefs bado haijafahamika
Okwi huenda akaondoka mwishoni mwa msimu mkataba wake utakapomalizika hivyo ni vyema kwa Simba kusaka mbadala wake mapema
