Aussems kutumia mbinu za eSwatini kuiua Nkana Fc kwao

Kikosi cha mabingwa wa soka Tanzania Bara Simba kinatarajiwa kuondoka kwa awamu mbili keshokutwa Jumatano na Alhamisi alfajiri kwenda nchini Zambia kwa ajili ya mchezo wa kwanza wa ligi ya mabingwa dhidi ya Nkana Fc.

Mchezo huo wa raundi ya kwanza utapigwa Jumamosi, Disemba 15 huko Kitwe Zambia.

Kocha Mkuu wa Simba Patrick Aussems amesema wanakwenda Zambia wakiwa na lengo la kushinda mchezo huo ili kujirahisishia kazi kwenye mchezo wa marudiano utakaopigwa uwanja wa Taifa wiki moja baadae.

Aussems ambaye anaendelea kuwaandaa vijana wake katika uwanja wa Boko Veterans, amesema watatumia mbinu walizotumia kwenye mchezo waliocheza eSwatini dhidi ya Mbabane Swallows

Katika mchezo huo ambao Simba iliibuka na ushindi wa mabao 4-0, ni mabingwa hao wa Tanzania waliotawala mchezo kwa muda mwingi na kuwafanya wenyeji wao waonekane kama wageni katika dimba lao.

Aussems ametamba kuwa yeye sio mfuasi wa soka la kujilinda kwani anaamini njia sahihi ya kujilinda ni kumiliki mpira na sio kuweka wachezaji wengi nyuma

Nae Katibu Mkuu wa Simba Dr Arnold Kashembe amesema maandalizi ya safari ya Zambia yamekamilika na wanatarajia msafara wa kwanza utaondoka keshokutwa Jumatano.

Dk Kashembe amesema tayari wametuma wawakilishi wao nchini Zambia kwa ajili ya kuweka mazingira sawa na mapokezi ya kikosi cha Simba ambacho kitafanya mazoezi nchini Zambia kwa siku mbili kabla ya mchezo