Sikia tambo za kocha wa Prisons

Baada ya mchezo mmoja wa ligi kuu ya Vodacom uliopigwa leo kuishuhudia Singida United ikiilaza Lipuli bao 1-0, michezo kadhaa ya ligi hiyo itapigwa kesho Jumamosi.

Mchezo unaosubiriwa kwa hamu na mashabiki wa soka ni mchezo kati ya Prisons dhidi ya Simba.

Kuelekea mchezo huo, kocha wa Tanzania Prisons, Mohammed Abdalah amesema kwamba Simba siyo timu kubwa, bali ni timu kongwe na haiwatishi chochote.

Abdallah amesema kwamba lengo lao ni kushinda na kurudia kile walichokifanya msimu uliopita dhidi ya Wekundu hao wa Msimbazi walipowachapa 2-1 Uwanja wa Sokoine.

“Tumejipanga vya kutosha kuchukua pointi tatu katika mchezo wetu dhidi ya Simba, ningependa tuondoshe hayo mawazo eti tunacheza na timu kubwa, sisi tunajua tunacheza na timu kongwe. Simba wao watakuwa na wachezaji 11, na sisi tutakuwa na wachezaji 11. Kila mwalimu kaandaa mbinu zake, tutapambana uwanjani,”amesema.

Abdallah amesema kikosi chake kipo vizuri na hakina majeruhi hata mmoja, baada ya kambi yao ya wiki moja Kahama na Iringa, wakitokea mkoani Kagera, ambako Novemba 4 walitoa sare ya 1-1 na wenyeji, Kagera Sugar uwanja wa Kaitaba katika mchezo mwingine wa Ligi Kuu.

Amesema katika kambi yao ya siku nne Kahama walipata pia na mchezo wa kirafiki wa kujipima nguvu dhidi ya Kabela City uliomalizika kwa sare ya 1-1 Alhamisi iliyopita kabla ya kwenda Iringa, ambako wanaondokea kuingia Mbeya kwa ajili ya mchezo na Simba kesho.