Viingilio mchezo dhidi ya Mbabane Swallows hadharani

Afisa Habari wa klabu ya Simba Haji Manara ametangaza viingilio vya mchezo wa ligi ya mabingwa hatua ya awali kati ya Simba dhidi ya Mbabane Swallows utakaopigwa keshokutwa Jumatano, Novemba 28 saa kumi jioni kwenye uwanja wa Taifa.

Akizungumza na waandishi wa habari leo, Manara amewataka mashabiki wa Simba na wadau wote wa soka nchini kujitokeza kwa wingi dimba la Taifa keshokutwa ili kuwapa sapoti wawakilishi hao wa nchi.

"Tunakwenda kuwakabili Mbambane keshokutwa Jumatano tukijua ni timu nzuri na mabingwa wenzetu. Lakini tunajua matarajio ya Watanzania na Wanasimba kwetu. Kiukweli hatutawaangusha na tunaahidi furaha kwenu," asema Manara

Manara ametaja viingilio vya mchezo huo kuwa ni;

VIP A - 20,000/-
VIP B na C - 10,000/-
Orange - 7,000/-
Mzunguuko - 5,000/-

Wakati huo huo Manara amesema klabu ya Mbabane Swallows inatarajiwa kuwasili nchini usiku wa kuakia kesho, saa saba usiku.

Mbabane ambayo haikuwa imetoa taarifa kwa Simba juu ya ujio wao, imewasiliana na TFF kuthibitisha kuwa watawasili leo usiku.