Chama ni wa Kimataifa - Aussems

Kiwango kinachoonyeshwa na kiungo wa Kimataifa wa Zambia Clatous Chama katika kikosi cha Simba kimewavutia watu wengi akiwemo kocha Mkuu wa Simba Patrick Aussems.

Akimueleza Chama, Aussems amesema kiungo huyo ana kipaji cha hali ya juu na anaamini kama hatapunguza kasi yake aliyonayo sasa basi siku si nyingi ataondoka barani Afrika kwenda kusakata kabumbu Ulaya.

Amesema uwezo unaoonyeshwa na kiungo huyo ni mkubwa na anaamini ataisaidia Simba kufanya vizuri kwenye ligi pamoja na michuano ya ligi ya mabingwa inayotarajiwa kuanza mwishoni mwa mwezi ujao

"Huyu kijana ana kipaji cha hali ya juu ni hazina kwa taifa lake ninamshauri asibweteke azidi kujituma ni suala la muda tu kwake aweze kucheza kimataifa na kudumisha nidhamu kwani hicho ndicho huwashinda wachezaji wengi," alisema.

Chama tayari ameifungia Simba mabao mawili kwenye ligi na amekuwa 'injini' ya kuendesha mashambulizi ya Simba.

Kiungo huyo pia ni mchezaji wa kutegemewa wa kikosi cha timu ya Taifa ya Zambia 'Chipolopolo'