Aussems apania kuongeza mabao Simba

Kocha Mkuu wa Simba Patrick Aussems amesema amekuwa akifanyia kazi mapungufu ya timu yake hasa katika safu ya ushambuliaji kuhakikisha timu hiyo inafunga mabao mengi.

Hata hivyo Aussems amesema kwa sasa wanachohitaji zaidi ni ushindi kwenye michezo yao bila ya kujali idadi ya mabao wanayofunga.

Amekiri ni kweli Simba imekuwa ikitengeneza nafasi nyingi sana kwenye michezo yake lakini imekuwa haizitumii ipasavyo changamoto ambayo anaifanyia kazi.

"Kwa sasa tunataka timu yetu ishinde hatujali ni kwa mabao mangapi. Wale wanaotukosoa kwamba timu yetu haifungi mabao mengi nawakumbusha kuwa kinachohitajika zaidi ni ushindi," amesema Aussems.

"Hata hivyo ni kweli tumekuwa na ufanisi mdogo langoni ukilinganisha na idadi ya nafasi tunazozitengeneza kwenye kila mchezo."

"Hilo tunalifanyia kazi," amesema.

Aidha, baada ya kuondolewa kwa kocha Msaidizi Masudi Djuma, Aussems amesema anataka mbadala wa Djuma awe na uzoefu wa soka la Tanzania lakini pia awe kiunganishi kizuri kati ya wachezaji na benchi la Ufundi.

Simba imeendelea kujifua kwenye uwanja wa boko Veterans kujiandaa na michezo ijayo ya ligi kuu ya Tanzania Bara licha ya kuwa ligi imesimama kupisha michezo ya timu za taifa.