Klabu ya Simba imethibitisha kuwa Septemba 24 kikosi kitasafiri Afrika Kusini kuweka kambi ya maandalizi ya mechi za ligi kuu na michuano ya ligi ya mabingwa (CAFCL).
Meneja wa Habari na Mawasiliano wa Simba Ahmed Ali amesema uongozi umewapa mapumziko wachezaji ambao hawana majukumu ya timu ya Taifa na watarejea Septemba 24 na moja kwa moja kuelekea Afrika Kusini kwa ajili ya kambi.
"Kambi hii imesimamiwa moja kwa moja na Rais wa heshima Mohamed Dewji 'Mo' ambaye ameona siku hizi 10 badala ya kuendelea kufanya mazoezi Bunju, timu iweka kambi ya muda mfupi Afrika Kusini kwa ajili ya utulivu na kufanya maandalizi yetu"
"Mwezi wa 10 utakuwa wa 'moto' kutokana na ratiba ya michuano mbalimbali ambayo Simba inashiriki hivyo kambi hii imezingatia mahitaji yetu kuelekea ratiba hiyo ngumu," alisema Ahmed
Ahmed amesema kambi hiyo haitawahusu wachezaji walioitwa kwenye majukumu ya timu za Taifa ambapo wachezaji 7 wameitwa kikosi cha timu ya Taifa ya Tanzania 'Taifa Stars' ambao ni Nathaniel Chilambo, Vedastus Masinde, Bakari Msimu, Nickson Kibabage (majeruhi), Anthony Mligo, Yusuph Kagoma na Moricce Abraham
