Mbao FC yarudi kileleni Ligi Kuu

Mbao FC inaonekana kuimarika msimu huu baada ya leo kulazimisha suluhu ya bila kufungana dhidi ya Singida United kwenye mchezo wa ligi kuu ya Tanzania Bara raundi ya tatu uliopigwa dimba la Namfua, Singida.

Mbao FC iko kileleni mwa msimamo wa ligi baada ya kufikisha alama saba, ikiwa imeshinda michezo miwili na kutoka sare mchezo mmoja.

Ligi hiyo itaendelea kesho Jumamosi, Septemba mosi kwa michezo mitano kupigwa kama inavyoonekana hapa chini;

Stand United vs Bishara
Coastal Union vs KMC
Mtibwa Sugar vs Mbeya City
Kagera Sugar vs African Lyon
Prisons vs Alliance

Baada ya michezo ya wikiendi hii, ligi itasimama kwa muda wa wiki mbili kupisha michezo ya Kimataifa kwa mujibu wa kalenda ya FIFA.

Simba iliyokuwa icheze na Lipuli FC kesho mchezo huo uliahirishwa baada ya wachezaji saba wa Simba kuitwa timu ya Taifa.

Hata hivyo kocha Mkuu wa Stars Emmanuel Amunike aliwaondoa wachezaji sita wa Simba isipokuwa Aishi Manula sababu ikielezwa kuchelewa kuripoti kambini.

Mapema leo Amunike alifanya mazungumzo na wachezaji hao na kuwahakikishia kuwa atawajumuisha kwenye kikosi cha Stars siku zijazo kama wataendeleza viwango vyao.

Amesema kwa sasa hatawatumia kwa kuwa tayari ameshaita wachezaji wengine kuchukua nafasi zao baada ya sintofahamu iliyojitokeza.