Timu ya Taifa Tanzania 'Taifa Stars' kesho Jumatano watashuka kwenye uwanja wa Nyayo nchini Kenya kuikabili Harambee Stars katika mchezo wa kirafiki yakiwa ni maandalizi kuelekea mchezo wa kuwania kufuzu fainali za Afcon 2021 dhidi ya Guinea ya Ikweta
Tanzania iliyowasili Kenya jana, leo jioni ilifanya mazoezi yake ya mwisho katika uwanja huo wa Nyayo
Kocha Mkuu wa Tanzania Kim Poulsen amesema vijana wake wako tayari kuikabili Kenya hapo kesho
"Tumejiandaa vizuri kwa mchezo wa kesho wa kirafiki dhidi ya Kenya. Tumefanya mazoezi ya kupiga pasi, kupokea pasi pia na katika hali ya kawaida timu iko vizuri, tuko tayari kwa kucheza kandanda Safi na kila mchezaji yuko tayari kwa mchezo kutoka na mazoezi yaliyofanyika," alisema Poulsen
Naye Kiungo wa Stars Himid Mao amesema wachezaji wote wako katika hali nzuri wakiwa na matumaini ya kufanya vizuri katika mchezo huo
Tanzania itacheza mechi mbili za kirafiki dhidi ya Harambee Stars huko Kenya. Baada ya mchezo wa kesho, timu hizo zitarudiana siku tatu baadae katika uwanja wa Kasarani
