Kaimu Kocha Mkuu wa Yanga, Juma Mwambusi amesema anahitaji kuweka mikakati kulingana na mashindano yaliyoko mbele na namna gani wajipange kuhakikisha wanatimiza malengo yaliyokusudiwa
Uongozi wa Yanga umemrejesha Mwambusi kwenye nafasi ya kocha msaidizi baada ya kuvunjwa kwa benchi la ufundi lililokuwa likiongozwa na kocha Cedric Kaze
Wakati mchakato wa kusaka kocha mpya ukiendelea, Mwambusi amekaimu nafasi ya Kocha Mkuu
Kocha huyo wa zamani wa Mbeya City, amesema atazungumza na wachezaji wake siku ya Jumatatu ili kuweka mikakati sawa.
"Nitakutana na wachezaji na kufanya nao kikao tuweke mikakati yetu kuelekea kwenye mechi za Ligi Kuu, Kombe la FA namna ya kujipanga kufanya vizuri,”alisema
Aidha, Mwambusi amesema mkakati huo lazima uende sambamba na mkakati wa uongozi
Lengo la kwanza la Yanga msimu huu ni kunyakua ubingwa wa ligi kuu na lengo la pili ni kushinda taji la FA
Bado nafasi ya kushinda ubingwa wa VPL ipo lakini mabingwa hao wa kihistoria wanapaswa kujisahihisha makosa waliyofanya tangu kuanza kwa duru ya pili ambapo wameshinda mechi moja, sare tatu na kufungwa mchezo mmoja
