Jana ziliibuka taarifa kuwa kocha wa viungo Edem Mortotsi amerejeshwa kuendelea na majukumu yake
Mortotsi alikuwa miongoni mwa waliotemwa baada ya uongozi wa Yanga kutangaza kulivunja benchi lote la ufundi lililokuwa chini ya kocha Cedric Kaze
Kocha huyo raia wa Ghana, alijiunga na Yanga mwezi uliopita akitokea nchini Canada
Afisa habari wa Yanga Hassan Bumbuli amethibitisha kurejeshwa kwa Mortotsi huku akieleza sababu iliyopelekea arudishwe kuwa ni baada ya kubaini hakuwa na kosa lolote kwani hakuwa na zaidi ya siku 30 tangu alipojiunga na Yanga
"Uongozi umekaa na kuamua kumrudisha kocha wa viungo Mortotsi, sababu hawakuona kosa lolote kwenye idara yake hivyo kwa sasa ataendelea na ajira yake akisaidiana na Mwambusi tukiamini ataendeleza yale ambayo tulikuwa tunayatarajia kutoka kwake," alisema Bumbuli
Bumbuli amesema mchakakato wa kumpata kocha mpya atakayeinoa timu hiyo unaendelea vizuri na pengine wiki ijayo wanaweza kuwa na jina la kocha mpya
Alisema wamepokea CV za makocha wengi kutoka mataifa mbalimbali na wanachokifanya hivi sasa ni kuzipitia kwa makini ili kupata kocha bora atakaye ipa timu yao mafanikio katika mbio za Ligi Kuu zinazoendelea hivi sasa
Kocha Msaidizi Juma Mwambusi ambaye kwa sasa anakaimu nafasi ya kocha mkuu, alianza rasmi majukumu yake hapo jana akisaidiana na Mortotsi
