Mwenyekiti wa klabu ya Yanga Dk Mshindo Msolla jana alitangaza kurejeshwa kwa Juma Mwambusi kuwa Kaimu Kocha Mkuu akichukua nafasi ya iliyoachwa na Kocha Cedric Kaze aliyetimuliwa baada ya mchezo dhidi ya Polisi Tanzania uliomalizika kwa matokeo ya sare ya bao 1-1 mwishoni mwa wiki iliyopita
Dk Msolla alisema kuwa mchakato wa kumtafuta kocha tayari umeanza jukumu hilo likiachwa mikononi mwa Kamati ya Ufundi iliyosheheni Wana taaluma wa soka
Aidha Dk Msolla alidokeza kuwa kwa sasa Wanahitaji kocha mwenye 'CV nzuri' kigezo cha kwanza awe kocha mwenye uzoefu na soka la Afrika ambaye atamudu kufanya kazi katika mazingira ya Tanzania
"Kamati ya ufundi itapokea CV za makocha mbalimbali na wao watachambua kulingana na vigezo ambayo tutakuwa tumeweka. Lakini muhimu kocha tunayemuhitaji sisi awe na uzoefu wa soka la Afrika na ambaye ataweza kufanya kazi katika mazingira yetu," alisema Dk Msolla
Dk Msolla aliongeza kuwa kwa sasa timu itakuwa chini ya Kocha Juma Mwambusi, wana imani kubwa na kocha huyo kwani sio mgeni kwa kikosi hiki cha Yanga msimu huu
"Tumekuwa na Mwambusi tangu mwanzo mwa msimu, aliondoka baada ya michuano ya kombe la Mapinduzi baada ya kuugua. Yanga imemsaidia matibabu yake na sasa amepona. Hakuna jambo geni kwake, wachezaji wote anawafahamu, naamini timu itakuwa salama chini yake wakati tunaendelea kutafuta kocha mpya"
