Kaimu Katibu Mkuu wa Yanga Haji Mfikirwa amesema Kamati ya Utendaji inatarajiwa kukutana leo kuandaa mchakato ambao utatumika kupata benchi la ufundi
Mfikirwa amesema timu ilirejea jijini Dar es salaam jana wakitokea mkoani Arusha ambao juzi walilazimishwa sare ya bao 1-1 dhidi ya Polisi Tanzania
Ni matokeo hayo yaliyopelekea kuvunjwa kwa benchi zima la ufundi lililokuwa likiongozwa na kocha Cedric Kaze
Amesema wanatarajia kukamilisha mchakato huo mapema, makocha wanaotajwa kwenye mitandao ya kijamii ni tetesi tu kwa sababu hawajatangaza jina la kocha yeyote ambaye atakuja kurithi mikoba ya Kaze
Amesema baada ya juzi kutoa taarifa ya kuvunja benchi la ufundi, uongozi unatarajia kukutana leo, kwa ajili ya kuweka mambo sawa ikiwamo mchakato ambao utatumika kwa ajili ya kupata benchi zima la ufundi.
"Bado hatujaweka wazi, mchakato upi tutatumia kupata benchi la ufundi, kwa sababu tulitoa taarifa ya kuvunja benchi la ufundi tukiwa Arusha, sasa tunarejea nyumbani na kesho (leo), Kamati ya Utendaji itakutana kwa ajili ya kuangalia mchakato upi ambao tutautumia kupata benchi la ufundi," alisema Mfikirwa
Mfikirwa amesema wanahitaji kufanya mchakato huo mapema ili benchi la ufundi litangazwe hivi karibuni kabla ya ligi kuendelea kushika kasi mzunguko wa pili, ambao kwa sasa itasimama kwa muda wa wiki tatu kupisha kalenda ya michuano ya kimataifa
