Jana kupitia ukurasa wake wa mtandao wa kijamii, mlinda lango Metacha Mnata aliwashukuru mashabiki wa Yanga kwa sapoti na ushirikiano waliompa katika kipindi cha miaka miwili huku akiwatakia kila la kheri na mafanikio mema
Ujumbe huo ulizua taharuki kwenye mitandao ya kijamii kwani ni kama Metacha alikuwa akiwaaga Wanayanga
Hata hivyo Metacha aliuondoa ujumbe huo kwenye ukurasa wake baada ya muda mfupi
Tangu juzi uongozi wa Yanga ulivyovunja benchi lote la ufundi, wameendelea na vikao vya ndani
Zipo tuhuma za hapa na pale ambazo baadhi ya wachezaji wametuhumiwa kutokana na viwango vyao katika michezo iliyopita
Jana Yanga iliweka wazi kuwa wamezungumza na wachezaji, wanachunguza wale ambao watabaini kwa namna yoyote wanahusika kuhujumu timu basi hawatasita kuwachukulia hatua
Ukweli ni kwamba hakuna anayefurahishwa na mwenendo wa Yanga, uamuzi wa kumtimua kocha Cedric Kaze na benchi lake la ufundi haukuchukuliwa hivihivi
Ni baada ya kujiridhisha kuwa yapo mambo hayako sawa, hivyo halitakuwa jambo la kushangaza kusikia hata upande wa wachezaji baadhi yao nao wakaingia matatani
Hiki ni kipindi ambacho Wanayanga wanapaswa kuwa wamoja, wawaache viongozi wao wafanye kazi, kwani jambo lolote litakaloamuliwa, litawekwa hadharani
