Kocha Mkuu wa Yanga Princess Edna Lema 'Morinho' amesema msimu huu Yanga imeingia katika mtego ambao kama hawatafanikiwa kuutegua, utawaumiza wachezaji na mashabiki wao
Lema ambaye kikosi chake cha Yanga Princess kinaongoza msimamo wa ligi kuu ya Wanawake wakiwa wamejikusanyia alama 38, amesema Yanga inakabiliwa na changamoto ya kujenga kikosi chake lakini wakati huohuo wanapaswa kutwaa ubingwa wa ligi kuu
"Kuna tofauti kati ya Yanga na simba. Yanga wameingia kwenye mtego wa kazi mbili kwa wakati mmoja. Kwanza kutengeneza timu yao na kuhakikisha wanapata matokeo mazuri na kutafuta ubingwa"
"Simba ni tofauti kwani wanaendelea kucheza kwenye kiwango chao ambacho wamekionesha katika misimu mitatu iliyopita baada ya kutengeneza timu yao"
"Yanga wataendelea kuwa kwenye presha kwa sababu wanahitaji ubingwa zaidi kuliko ambavyo wanafikiria. Mashabiki wanakiu ya kuona timu yao inarudi kwenye ubora iliokuwanao misimu mitano nyuma"
"Kwa sasa Simba wakikosa ubingwa halitakuwa jambo kubwa kwao tofauti na Yanga ambao kukosa ubingwa kunaweza kuwaathiri wachezaji na mashabiki wao," Lema aliiambia Clouds FM
Zaidi ya nusu ya wachezaji wa Yanga ni wapya, kuanzia duru ya pili ya msimu uliopita, GSM walijitosa kuisuka upya Yanga baada ya misimu mitatu ya kutofanya vizuri
Yanga imeanza vyema msimu huu ikiwa kileleni mwa msimamo wa ligi, lakini ikiwa timu pekee ambayo haijapoteza mchezo
