Hivi karibuni Makamu Mwenyekiti wa Yanga Fredric Mwakalebela alitoa malalamiko mbalimbali akilituhumu Shirikisho la Mpira wa Miguu Tanzania (TFF) kutoitendea haki klabu hiyo katika masuala mbalimbali
Miongoni mwa tuhuma alizozitoa Mwakalebela kwa TFF ni chombo hicho chenye mamlaka ya usimamizi wa soka nchini kutojibu wala kusikiliza malalamiko ya Yanga juu ya kesi mbalimbali
Miongoni mwa kesi hizo ni ile ya Bernard Morrison ambapo Mwakalebela alibainisha kuwa waliiandikia barua TFF wakitaka mchezaji huyo azuiwe kuitumikia klabu ya Simba kwa kuwa mkataba wake haukuwa halali
Aidha Mwakalebela pia alibainisha kuwa Morrison hakurejesha fedha alizochukua Yanga pamoja na kuwa Kamati ya Sheria na Hadhi za Wachezaji ilimwamuri arudishe fedha zote
Mwakalebela alibainisha kuwa waliwasiliana na TFF kuhusu hatma ya fedha hizo lakini hawakupata majibu yoyote
Lakini pia, wakati TFF ikiwa haijasikiliza malalamiko yao, kupitia Kamati yake ya Maadili,ilisikiliza shauri lililomuhusu Afisa Habari wa Yanga Hassan Bumbuli na kumfungia kutojihusisha na soka kwa kipindi cha miaka mitatu akidaiwa kuchelewa kulipa faini ya Tsh Milioni Tano kwa shauri lililokuwa likihusiana na kesi ya Morrison
Pia kulikuwa na suala la waamuzi ambao hawakuwa wakiitendea haki Yanga katika baadhi ya michezo na kupelekea mashabiki wa Yanga kufanya vurugu ambazo zinapelekea timu hiyo kuadhibiwa kila mara ya kamati ya Saa 72
Sasa TFF imeeleza kuwa tayari kusikiliza shutuma zilizotolewa wakiitaka klabu ya Yanga kuthibitisha shutuma hizo
"Baada ya kupitia shutuma zote, kamati imeona kuna haja ya mtoa shutuma kupewa haki ya msingi ya kusikilizwa na kuthibitisha madai yake mbele ya Kamati husika," ilisomeka sehemu ya taarifa ya Kamati
Kamati ya Usimamizi wa ligi imerejesha shauri hilo TFF ili lifikishwe mbele ya kamati inayohusika kwa ajili ya kusikilizwa
